A Nosa Proposta

Partindo da idea de que non só as grandes cidades teñen dereito a ter arquivos e o patrimonio cultural das localidades pequenas ten tanto valor como o das capitais, cremos que as tecnoloxías actuais e os medios dixitais permiten que as persoas podemos aportar o noso grao de area a conservar e enriquecer a cultura.

A través deste proxecto preténdese pór en valor as historias. Historias das persoas, das veciñas e veciños. Historias das parroquias, que teñen o mesmo dereito de ser preservadas que as doutros lugares. Historias, contos, fotos, sons... para ser arrimadas. Arrimadas, xuntadas; arrimadas, ordeadas. Arrimando Historias quere recuperar imaxes e sons do pasado e do presente, ben sexan fotografías, ben sexan contos ou lendas, ben sexa o son das campás na festa da parroquia.

Co material recopilado facemos un catálogo, un arquivo dixital para pór a disposición de persoas que teñan curiosidade por aprender un pouquiño do que acontece neste curruncho do mundo, e para garantir que as xeracións vindeiras saiban de onde veñen e sexan coñecedoras de que a cultura non é só o que aparece nos libros de texto ou nas galerias de arte.